ສຳລັບນັກລົງທຶນອະສັງຫາໃໝ່ ທີ່ຕ້ອງການຊື້ເຮືອນເພື່ອເກງກຳໄລໄວ້ປ່ອຍໃຫ້ເຊົ່າ ຫຼື ຂາຍຕໍ່ ຫາກຍັງບໍ່ຮູ້ຈະເລີ່ມຕົ້ນແບບໃດ? ມື້ນີ້ພວກເຮົາຈະມານຳສະເໜີເຄັດລັບທີ່ເຮັດໃຫ້ຂາຍເຮືອນໄດ້ກຳໄລງາມ ເພື່ອເປັນພື້ນຖານໃຫ້ທ່ານນຳເອົາໄປປະຕິບັດດັ່ງນີ້:
1.ຈຸດທີ່ຕັ້ງມີໄຊໄປກວ່າເຄິ່ງ: ບໍ່ວ່າຈະຊື້ເຮືອນເພື່ອຢູ່ອາໄສ ຫຼື ເພື່ອລົງທຶນ ຈຸດທີ່ຕັ້ງເປັນເລື່ອງສຳຄັນ, ຫາກວ່າໄດ້ສະຖານທີ່ເປັນເຂດແອອັດ, ວິວບໍ່ງາມແລ້ວ ບໍ່ວ່າຈະຢູ່ເອງ ຫຼື ປ່ອຍໃຫ້ເຊົ່າ ຜູ້ອາໄສກໍ່ອາດຈະອຶດອັດທີ່ຕ້ອງຢູ່ເຮືອນສະພາບແບບນີ້ ສິ່ງທີ່ຕ້ອງເລືອກກໍ່ແມ່ນເລື່ອງຂອງຈຸດທີ່ຕັ້ງຖືວ່າສຳຄັນຫຼາຍ.
2. ຊື້ໃຫ້ເຊົ່າກ່ອນຂາຍຂາດ: ໃນສະໄໝທີ່ກໍາລັງຮ້ອນແຮງດ້ວຍຄອນໂດ ນັກທຸລະກິດສ່ວນໃຫຍ່ຊອກຫາຊື້ ເພື່ອປ່ອຍເຊົ່າ ແລະ ຂາຍຕໍ່ເປັນຈໍານວນຫຼາຍ, ແຕ່ຄວນຊື້ໄວ້ເກີນ 5 ປີ ແລ້ວປ່ອຍເຊົ່າໄວ້ກ່ອນ ເພາະຈະໄດ້ລາຄາດີ ແລະ ກໍາໄລງາມກວ່າຊື້ມາແລ້ວຂາຍຂາດໃນຄັ້ງທໍາອິດ, ບາງເທື່ອຜູ້ທີ່ເຊົ່າອາດຈະເປັນຜູ້ຊື້ເອງ ເພາະເຂົາຈະເກີດຄວາມຜູກພັນກັບສິ່ງທີ່ຢູ່ອາໄສຈົນຕັດສິນໃຈຊື້ໃນທີ່ສຸດ.
3. ກຽມຄວາມໜ້າເຊື່ອຖືທາງການເງິນໃຫ້ພ້ອມ: ການສ້າງຄວາມເຊື່ອຖືໃຫ້ກັບທະນາຄານຍິ່ງດີ ເພາະເວລາພົບເຫັນສະຖານທີ່ຖືກໃຈ ຫຼື ຈຸດທີ່ຕັ້ງດີຈະໄດ້ຕັດສິນໃຈຊື້ງ່າຍ ຖ້າຫາກເລັງໄວ້ດີ, ວິເຄາະໄດ້ຖືກແຕ່ການເງິນບໍ່ພ້ອມ ແລະ ຄວາມໜ້າເຊື່ອຖືທີ່ເສຍໄປຖືກປະຕິເສດຈາກທະນາຄານ ຝັນກໍ່ສະຫຼາຍກາງອາກາດໄດ້ເລີຍ.
4. ສໍາຫຼວດລາຄາຊື້ – ຂາຍຫຼາຍໆແຫ່ງ: ເພື່ອຫຼຸດ ຄວາມສ່ຽງໃນການລົງທຶນ, ການສໍາຫຼວດຫຼາຍໆແຫ່ງແລ້ວມາປຽບທຽບກັນດີທີ່ສຸດ ເພື່ອປ້ອງກັນວ່າເຮົາຊື້ອະສັງຫາລິມະຊັບທີ່ສູງເກີນໄປ ຫຼື ບໍ່? ແລະ ເວລາຂາຍຈະໄດ້ກໍາໄລງາມໆ.
5. ກະຈາຍຄວາມຕ້ອງການ: ຢ່າຕັ້ງເປົ້າດ້ວຍການເລັງໄປທີ່ຕົວເມືອງຫຼັກ ຫຼື ເມືອງຫຼວງຢ່າງດຽວ. ນອກຈາກຄູ່ແຂ່ງຈະຫຼາຍ, ລາຄາກໍ່ສູງອີກ; ລອງເຈາະກຸ່ມລູກຄ້າຖານະປານກາງ ແລະ ເລັງເປົ້າທີ່ເຮືອນແຖບຊານເມືອງລອງເບິ່ງ ເພື່ອເປັນຕົວເລືອກໄວ້ກໍ່ດີ.

ແຫຼ່ງທີ່ມາຈາກ: ເສດຖະກິດການຄ້າ